San Na U?

Nakatanggap ka na ba ng isang teks sa iyong celepono na nakalagay, “San na powh u? D2 na me!”? Pagpasok mo sa isang kainan kagaya ng Jollibee o kaya Mang Inasal, narinig mo na ba ang “Magandang morning po ma’am sir!”? Habang nagsasalita ka sa iyong mga kaibigan habang naghahanap ng isang pagkakainan dahil gutom na gutom ka na, nadulas ka na ba at nasabi mo ay “Pare, dude, tol? Where na we kakain? Is it mahal over there? I think its more mura over here? Tara! Lets kain kain na you know.”? O kaya habang pinapanood mo ang iyong paboritong palabas at biglang lumabas ang patalastas ni Manny Pacquiao na VitWater at narinig mo ay “Vitwater, Oh now you know..Try one na!” Habang ikaw ay lumalakwatsa at naghahanap ng bagong damit, natanong mo na ba sa isang sales lady na “Miss, ano kaya ang hot na mga t-shirt ngayon? I want to make porma for my girlfriend kasi e. She’s so very maganda and very siksik to the bone you know.”? Nakatiempo ka na ba na ikaw ay naubusan ng pagpaparadahan sa isang mall na ikaw ay nagtanong sa isang sekyu na “Manong Guard, saan po ba me makakapark dito? It’s a very very puno kasi e? Can you make sama with me to find a parking slot? Thank you po sa inyong tulong!”? Nakatapak ka na ba ng isang malaking tae ng aso at napasigaw, “Ewww! It’s a very kadiri naman oh! It will make baho my Islander tsinelas!”? Nakasakay ka na ba sa isang taksi at tinanong ka na ng nagmamaneho na “Miss? Is it a very very mainit? Kasi, when you made pasok into my car biglang uminit e. Ikaw ha, you very hot hot ah!”? Lumakad ka na ba sa Commonwealth Ave. habang ikaw ay uhaw na uhaw na ay nakakita ng nagtitinda ng mga palamig at nagtanong, “Bosseng? Thirst-quenching ba ang binebenta mong drinks? Grabe kasi the usok and the sun, it made me uhaw uhaw!”? Habang ikaw ay umiihi sa isang pampublikong banyo, sinabihan ka na ba ng katabi na “Hey mehn, that’s a very mahaba ah!” at kinindatan ka? Sinigawan ka na ba ng syota mo na “Chickboy ka talaga! Ang daming mong girls! At hindi ako si Nicole, my name is Lisa!”? Sigurado naman na habang ikaw ay naka-upo sa may Sec Area at nasisiyahan sa magandang tanawin ay napasabi ka sa iyong kaibigan na “Hey chong! Haba ng kanyang hair ah at ang laki ng kanyang libro!” Nang ikaw ay naghahanap ng makakain sa bahay at wala kang makita, nagtanong ka na ba sa iyong kasama sa bahay mo na “Teh! Can you make luto me hotdog? Gusto ko ang hotdog na extra crispy na may extrang egg ah.”? Narinig mo na ba ang iyong pinsan galing Zamboanga na nagsabi sa isang Kano na “Hey Joe! You so japorms ah! I make kopya your style! Gusto mo i-check out ang aking shades”?

Natawa ka ba o kaya naiinis sa mga ehemplo ng ating bagong dialekto natin na ang tawag ay Taglish o salitang Conyo? Ano nga ba ulit ang Taglish?


Ang Taglish, pinagsamang salita na "Tagalog" at "English," ay ang impormal na diyalekto ng Tagalog, sa Pilipinas, na hinaluan ng katagang Ingles Amerikano. Marahil na karaniwan ang Taglish sa Kalakhang Maynila at naging malaki ang impluwensiya sa maraming bahagi ng bansa.
Bakit nga ba ginagamit natin ginagamit ang dialektong Taglish? Hindi ba dapat tayo’y magsalita ng Tagalog lamang o kaya purong Ingles lang? Kailan ba ito naging uso? Dati pa kayang ginagamit ang Taglish sa kapanuhan nina Macapagal at Marcos? Sino nga ba ang gumagamit nitong salita? Ang mga mayayaman lang ba ang gumagamit nito? Naging uso na nga ba ‘to sa mga masa dahil sa mga programang pinapanood nila kagaya ng “May Bukas Pa” kung saan palaging kausap ni Santino si Bro o si Kuya Jess? Baka naman narinig nila ito sa kanta ni Jimmie Bondoc na ang “I belive” na ang isa sa nagpasimula ng mga Taglish songs sa Pilipinas. Saan at kailan nga ba talaga nagsimula ang wikang Taglish?


Sa aking palagay ang wikang Taglish ay nagsimula dahil hindi kayang palitan ng salitang Tagalog ang mga ibang salitang Ingles kagaya ng laptop, ballroom, o kaya ng hotdog? Hindi naman siguro magandang pakinggan sa iyong mga tenga ang mga salitang hitang-taas, bolang-kwarto at ang maiinit na aso, hindi ba? Sa aking tingin, ginagamit din naman ang Taglish dahil ito ay mas malambing at nakaka-akit pakinggan. Ang mga linyang “I miss you na e” at “I love you talaga” ay mas malambing at mas masarap pakinggan kaysa sa diretsong “Mahal kita” o “Naalala kita”. Ganap din sa ating bansa ang mahinang pagturo ng edukasyon sa ating mga pampublikong paaralan at minsa’y binabale wala ang pagtuturo ng wikang Ingles at Tagalog. Ang mga titser minsa’y gumagamit ng salitang Tagalog kahit sila ay nagtuturo ng Ingles sa kanilang mga estudyante. Kaya tuloy paglabas ng mga estudyante sa pader ng eskwelahan ay ginagamit nila ang dialektong naririnig nila sa kanilang titser.


Madaming rason kung bakit ganap na ganap ang wikang Taglish sa ating bansa? May maibibigay ka kaya? Ito na ba ang ating dialekto sa mga susunod na panahon? Mawawala na ba talaga ang kasaysayan ng wikang Tagalog ? May magagawa pa ba tayo sa sitwasyong natin ngayon? Ito na ba ang huling beses makakarinig ng isang pangungusap na purong Tagalog? Nasa inyo po iyon.